3w.Ya-Ali.ws » Mәqalәlәr » Mübahilə gününün əməlləri

Mübahilə gününün əməlləri

tarix : 09-11-2012 / Mәqalәlәr / Baxış sayı: 5 191

Gəlin biz də oğlanlarımızı, siz də oğlanlarınızı, biz də qadınlarımızı, siz də qadınlarınızı, biz də özümüzü, siz də özünüzü çağıraq! Sonra mübahilə (qarğış) edib yalançılara Allahın lənət etməsini istəyək!”. (Ali-İmran-61)

فَمَنْ حَاجَّكَ فِيهِ مِن بَعْدِ مَا جَاءَكَ مِنَ الْعِلْمِ فَقُلْ تَعَالَوْاْ نَدْعُ أَبْنَاءَنَا وَ أَبْنَاءَكمُ‏ْ وَ نِسَاءَنَا ونِسَاءَكُمْ وَ أَنفُسَنَا وَ أَنفُسَكُمْ ثُمَّ نَبْتهَِلْ فَنَجْعَل لَّعْنَتَ اللَّهِ عَلىَ الْكَذِبِينَ

Mübahilə kəlməsinin kökü "bəhl"dir və mənası "lənət etmək"dir. Bu sözün lüğətdə də mənası budur. Amma sоnralar mənasını dəyişərək, "hər cür dua etmək" mənasında işlənməkdədir.

Mübahilə gününü İslam dininin qələbəsi də adlandırmaq olar. Hər bir müsəlman bu günü bilməli, bu gündə baş verən hadisədən xəbərdar olmalıdır. Çünki bu gün müsəlmanların düşmənləri üzərində olan qələbələrindəndir. İslamın haqq din olduğu, Peyğəmbərin(s) haqq olaraq göndərildiyi məhz bu gün bir daha həm müsəlmanlara və həm də, Nəcran məsihilərinə sübut olunmuşdur. Bu gün həm də, Peyğəmbər(s) Əhli-Beytinin(ə) kimlərdən ibarət olduğu bir daha aşkarlanmışdır. Əhli-Beytin(ə) mübarəkliyi, üstünlüyü, məqam və mənziləti, imanı, Peyğəmbərdən(s) sonra rəhbərliyə onların layiq olduğu bu gündə bir daha öz təsdiqini tapır. Bunu Qurani-Kərimdə olan ayə də təsdiqləyir.

Həmin ayə Ali-İmran surəsinin 61-ci ayəsidir ki, bu ayəni zikr etməzdən əvvəl, zəruridir ki, bu gündə hansı hadisənin baş verdiyini nəzərdən keçirək. Tarixdə qeyd olunur ki, hicriətin 10-cu ilində, Nəcran məsihiləri Hz.Məhəmmədlə(s) mübahisə etmək üçün öz böyüklərindən və alimlərindən ibarət bir heyəti Mədinə şəhərinə göndərirlər. Bu heyət Hz.Rəsuli-Əkrəmlə(s) mübahisə edir və tutarlı dəlillərlə, aşkar höccətlərlə üzləşmələrinə rəğmən, yenə də, İslamın haqq din olduğunu, Peyğəmbərin(s) peyğəmbərliyini qəbul etmirlər və Hz.İsanın(ə) Allahın oğlu deyil, bir peyğəmbər olduğunu qəbul etmirlər. Bu zaman Hz.Rəsuləllaha(s) bu ayə nazil olur: "(İsanın haqqında) sənə göndərilən elmdən sonra, (yenə də) səninlə mübahisə edənlər olsa, onlara de ki: "...Gəlin biz də oğlanlarımızı, siz də oğlanlarınızı, biz də qadınlarımızı, siz də qadınlarınızı, biz də özümüzü, siz də özünüzü çağıraq! Sonra mübahilə (qarğış) edib yalançılara Allahın lənət etməsini istəyək!”. (Ali-İimran-61)

Hz.İmam Sadiq(ə) Mübahilə gününün tarixçəsi barədə buyurur:"Nəcran xaçpərəstləri öz başçı, canişin və... ilə Hz.Rəsuləllahın(s) yanına gəlib dedilər: "Bizi nəyə dəvət edirsən?" Peyğəmbər buyurdu: "Allahdan başqa bir tanrının olmamasına, mənim Allahın elçisi olmağıma və İsanın Allahın yeyib-içən və ifrazat xaric olan... yaradılmış bir bəndəsi olmasına şəhadət verməyə... Buna görə də mənimlə mübahilə edin! Əgər mən doğru danışanamsa Lənət və nifrin sizi tutacaq və əgər yalançı olsam Lənət və nifrin məni tutacaq". Dedilər: "Ədalətli qərardır. Sonra mübahilə üçün vaxt təyin etdilər.". Onlar evlərinə qayıdandan sonra böyükləri dedi:"Əgər o, mübahiləyə öz qövmü ilə gəlsə onunla mübahilə edərik. Çünki əgər belə olsa, o, peyğəmbər deyil. Amma mübahiləyə yalnız ailəsi ilə gəlsə onunla mübahilə etmərik. Çünki əgər ailəsini təhlükəyə atırsa deməli doğrudan da düz deyir. Səhər açılandan sonra Peyğəmbərin(s) yanına gəldilər. Gördülər ki, Hz.Əli(ə), Hz.Fatimə(s.ə), Hz.İmam Həsən(ə) və Hz.İmam hüseyn(ə) onun yanındadırlar. Onlar qorxdular və Peyğəmbərə (s) dedilər: "Səninlə razılaşırıq, bizi mübahilə etməkdə üzürlü bil". Beləliklə, Allahın Peyğəmbəri(s) cizyə əsasında onlarla razılaşdı və onlar dağılışıb getdilər"

Burada İslam alimlərinin hamısının bu tarixi hadisəyə və Quran ayəsinə olan yekdil mövqeyini qeyd etmək istərdik ki, bu mövqe Əhli-Beytdən(ə) məqsədin kimlər olduğu aydınlaşır. Alimlər bildirirlər ki, ayədəki “oğlanlarımız” kəlməsindən məqsəd Hz.Həsən(ə) və Hz.Huseyn(ə), “qadınlarımız” kəlməsindən məqsəd Xanım Fatimeyi-Zəhra(s.ə) ,Peyğəmbərin(s) özü kimi təqdim edilən şəxs isə – Hz.Əlidir(ə) Yəni Əhli-Beytə(ə) bəzilərinin dediyi kimi Hz.Rəsuləllahın(s) xanımları daxil deyillər. Çünki əgər daxil olsaydılar, onlar da Mübahilə hadisəsində iştirak etmiş olardılar. Halbuki bu hadisə iştirak edənlər yəni Əhli-Beyt(ə) bu şəxslərdirlər:"Hz.Rəsuləllah, Hz.Əli(ə), Xanım Zəhra(s.ə), İmam Həsən(ə) və İmam Hüseyn(ə).

Bu günün bir neçə əməli vardır:

1. Qüsl etmək.

2. Oruc tutmaq.

3. 2 rikət namaz qılmaq. Namaz Zöhr azanından yarım saat sonra qüsl etdikdən sonra qılınır. Qılınma qaydası belədir: Hər rikətdə Həmd surəsindən sonra 10 dəfə İxlas, 10 dəfə, Ayətəl-Kürsi və 10 dəfə Qədr surəsi oxunur.

4. Sədəqə vermək.

5. Hz.Əlini(ə) ziyarət etmək.

6. Camee ziyarətini oxumaq.

Daha ətraflı məlumat üçün Məfatihul-Cinan kitabına müraciət edin.

Mübahilə günü-9 Noyabr(23 Zilhiccə)