Xəbərlərə abunə ol
» » » Həyat yoldaşına ehtiram

Həyat yoldaşına ehtiram

tarix : 09-02-2013   /   Mәqalәlәr / İslam’da Ailə   /   Baxış sayı: 19 791
Həyat yoldaşına ehtiram


İmam Rza (ə) Hz. Əlidən (ə) rəvayət edir: “Qadınlarınızın ən yaxşısı beş xüsusiyyətə malik olanlardır”. Soruşuldu ki, “Ya Əli, bu beş keyfiyyət nədən ibarətdir?”

Buyurdu:

1. Ərinə qarşı təvazökarlıq və üzüyolalıq, eləcə də bədxərclik etməyib qənaətcil olmaq;

2. Xoşxasiyyət, mülayimlik və mehribançılıq;

3. Əri ilə həmrəy olub, onun filirləri ilə razılaşmaq, işlərində ona kömək etmək;

4. Ərini əsəbi və ya yorğun halda gördükdə bütün işlərini, hətta öz istirahətini bir kənara qoyaraq onu şad edib sevindirmək;

5. Əri yanında olmayanda onun malını, namusunu, övladlarını, öz iffətini qorumaqda əlindən gələni əsirgəməmək”.

Sonra buyurdu: “Belə qadın Allah xidmətçilərindən sayılır və Allah xadimlərinə ümidsizlik yoxdur, onlar öz istəklərinə çatacaq”[1].

1. Qadının ərinə qarşı təvazökar olması deyiləndə bu nəzərdə tutulur ki, qadın ərinə qarşı təkəbbürlü olmamalıdır. Mənəm-mənəm deyib lovğalanmamalı, hər hansı bir məsələdə özünün üstün olduğunu göstərməyə çalışmamalıdır. Onun tövsiyələrini, nəsihətlərini rədd etməməli, əksinə qulaq asıb yerinə yetirməyə çalışmalıdır. Ərin etdiyi ən kiçik yaxşılığı belə böyük görüb ona qarşı minnətdar olmalıdır.

2. Qadın ərindən icazəsiz onun malından istifadə etməməlidir. Hətta öz malını istifadə etmək üçün də ərdən icazə alması müstəhəbdir.

Evin işləri əsasən qadına aid olduğuna görə o, evə nəyin lazım olub-olmadığını daha yaxşı bilir. Belə bir halda evin zəruri ehtiyaclarını təmin etmək üçün xərclənən maldan başqa qənaət edərək ərini əziyyətə salmamalıdır. Qadının idarəsi altında olan mal və sərvəti, ərinin razı qalmayacağı şəkildə xərcləməməlidir. Qadın dünya malına qarşı səbirli olmalıdır. Həyat yoldaşının çətinliklə qazandığı mal-dövləti bir dəqiqədə havaya sovurması, gərəksiz işlərə xərcləməsi düzgün deyil. Peyğəmbər (s) digər bir hədisində buyurmuşdur: “Qadın ərinin malının qoruyucusudur və ondan məsuldur”.

Hətta ərinin malından götürüb fəqirlərə yardım və qohumlara ehsan etməsi də haramdır və qəsb hökmündədir, yəni istifadə etdiyi miqdar nisbətində ərinə borcludur. Allah Rəsulu (s) buyurur: “Qadın icazəsiz olaraq kişinin malını heç kəsə verməməlidir. Əgər verərsə, malın günahı onun, savabı isə ərinindir”.

3. Xanım ərinə qarşı gözəl davranmalı, nəzakətli və gülərüzlü olmalıdır. Xüsusilə də, iş yerindən yorğun və dalğın bir vəziyyətdə evinə qayıdan ərini qadın xoş üzlə qarşılamalı, sevgi və hörmətlə dolu hərəkətləri ilə ona istirahət etmək üçün şərait yaratmalıdır. Hz. Fatimə buyurur: “Sizin ən yaxşılarınız camaatla mülayim və mehriban rəftar edənlər, ən dəyərliləriniz isə öz həyat yoldaşı ilə mehriban olanlardır”[2].

4. Qadın ərini qəzəbləndirməməlidir. Onun rahatlığını pozan hər bir hərəkətdən çəkinməli, onun razılığını əldə etməyə çalışmalıdır. Allahın Rəsulu (s) buyurur: “Vay olsun o qadına ki, ərini narahat edib qəzəbləndirə və xoş o qadının halına ki, əri ondan razı ola”[3].

İmam Sadiq (ə) buyurur: “Hər hansı qadın öz ərini yersiz olaraq qəzəbləndirsə və ər gecədən sübhə qədər bu halda qalsa, əri ondan razı olmayınca Allah onun namazını qəbul etməz”[4].

Təbii ki, bütün bunlar Allahın buyurduqlarına zidd hərəkət etməmək şərtilə həyata keçirildiyi təqdirdə gözəl bir əməl sayılır və Allahın razılığını qazanmağa səbəb olur. Əgər kişi öz xanımından Allahın əmrlərinə zidd olan nəsə tələb edərsə, ona itaət etmək nəinki vacib deyil, əksinə onunla mübarizə etmək lazımdır.

5. Ər-arvad bir-birinə Allahın razılığını qazanmaqda yardımçı olmalıdırlar. Qadın ərinin qanuni (İslama zidd olmayan) əmrlərinə itaət etməli, ağlabatan, mümkün olan tələb və tövsiyələrini yerinə yetirməlidir. Müsəlman kişi və qadın həyatın hər sahəsində istər müşkül məsələləri, istərsə də xoş işləri məsləhətləşərək həll edərlər. Uca Rəbbimizin: “… İşlərini öz aralarında məsləhət-məşvərətlə görər…”[5] ifadəsi möminlərə xas xüsusiyyətlərdən biri kimi göstərilməkdədir.

Qadının əri ilə mənasız məsələlər üstündə mübahisə etməsi, onunla razılaşmaması, evdə sakitliyi pozması doğru deyil. İmam Sadiq (ə) buyurur: “Ərinə əziyyət edib onu kədərləndirən qadın Allah dərgahından qovulmuşdur. Əri ilə nəzakətli olub onu incitməyən, həmişə sözünə qulaq asan qadın isə necə də xoşbəxtdir”[6].

Hədislərdə öz əri ilə gözəl rəftar edən, ona qarşı hörmət, sevgi və mehribançılıq göstərən qadın Allahın xidmətçisi kimi vəsf olunur. Uca Allah belə bir xanıma Cənnətini və razılığını vəd edib.

Şərhlər: 0

Şərh ələavə edin

Информация

Посетители, находящиеся в группе Qonaq, не могут оставлять комментарии к данной публикации.