Ana səhifə > İslam’da Ailə > Qadının ərinə xidməti

Qadının ərinə xidməti


17-02-2013, 05:38. Əlavə etdi: j3UtsbYPi^R3
Qadının ərinə xidməti


Abdullah ibn Abbasdan rəvayət edildiyinə görə bir qadın: “Ya Rəsuləllah, qadının cihadının qarşılığı (mükafatı) nədir?” – deyə soruşduqda Allah Rəsulu (s): “Ərinə itaət etməsi və onun haqqını yerinə yetirməsidir”[1] – deyə ona cavab verdi.

1. Qadın (İslam dininin əmrlərinə zidd olmayan məsələlərdə) daim ərinə itaət etməli, onun hər bir əmrinə tabe olmalı və hər bir sözünə diqqətlə yanaşmalıdır. İslam dini qadının ərinə itaət etməsi və ona sayğı göstərməsi haqqında çox tövsiyələr etmişdir. Rəsulullah (s) buyurmuşdur: “Qadın ərinin haqqını ödəmədikcə Allahın haqqını ödəməmişdir”.

Qadın ərinin qanuni əmrlərinə itaət etməli, ağla uyğun tələb və tövsiyələrini yerinə yetirməlidir. Bu, ərin arvadı üzərində olan ən önəmli haqqıdır. Arvadından itaət gözləyən ər ona ancaq islami hökmlərə uyğun olan əmr və göstərişlər verə bilər. Qanuni olmayan istəklər qadın və uşaqlar tərəfindən yerinə yetirilməməlidir. Buna görə itaət mütləq deyil, İslam dininə müxalif olmamaq şərti ilə olsa, düz olar, çünki Rəsulullah (s) Allaha üsyan sayılan əmrlərə itaət etməyin qadağan olduğunu bildirib. Ər arvadından nəyi istədiyini bilməlidir. Qadını taqətdən salan və ona çətinlik yaradan işlərlə onu yükləməməlidir. Əks halda kişi arvadına zülm etmiş olar, sevgi və hörmət bağlarının qırılmasına yol açmış olar.

İtaət etmək heç də qadının şəxsiyyətinin, şərəf və heysiyyətinin nəzərə alınmaması, onun fikirləri ilə hesablaşmamaq və kişinin qadına zülm edərək və məcburi şəkildə öz fikrini ona qəbul etdirməsi demək deyildir. Belə bir davranış özbaşınalıqdır, həddi aşmaq deməkdir.

2. Qadının ərinə xidmət etməsi böyük bir ibadət sayılır. Allah Rəsulu (s) buyurur: “Qadının öz ərinə bir içim su verməsi gündüzləri oruc tutub, gecələri namaz qılmaq üçün oyaq qaldığı bir ilin ibadətindən üstündür”[2].

Qadın evinə xidmət etməli, yemək bişirmək, evi təmiz saxlamaq və dərzilik etmək kimi ev işlərini icra etməlidir. Qadın əri qarşısında gözəl əxlaq nümayiş etdirmək, savab qazanmaq və ərinə xidmət niyyəti ilə könüllü olaraq bu işləri yerinə yetirərsə, Allahın rəhmətinə nail olar. İmam Sadiq (ə) Peyğəmbərin (s) belə buyurduğunu nəql edir: “Allah xidmət məqsədilə ər evində bir şeyi yerbəyer edən qadına rəhmət gözü ilə baxar. Haqqın nəzəri altında olan şəxs də Onun əzabından amanda qalar”.

Qadın öz vəzifələrini gözəl bir şəkildə yerinə yetirdiyi təqdirdə İslam dini baxımından ən gözəl əməllərdən birini etmiş sayılır. Hz. Əli (ə) buyurur: “Qadının cihadı ərinə yaxşı baxmasıdır”[3].

Bununla bağlı bir hədis də rəvayət olunur. Ənsar qadınlarından Əsma bint Yəzid bir gün Rəsulullahın (s) hüzuruna gələrək ona dedi: “Ey Allahın Elçisi, mən arxamda dayanan müsəlman qadınların bir təmsilçisiyəm. Onları təmsil edərək gəldiyim üçün onlar mənim söylədiyimi deyir və fikrimi paylaşırlar. Şübhəsiz ki, Allah səni həm kişilərə, həm də qadınlara (peyğəmbər olaraq) göndərdi. Biz sənə iman etdik və sənə itaət etdik. Biz qadınlar qrupu ərlərinə sədaqətli, evlərinə bağlı, təsəttürlü (hicablı) xanımlarıq və hər birimiz öz evimizdə oturmuşuq. Kişilər isə cümə və cənazə namazlarına qatılaraq camaatla birgə cihadda iştirak edərək savab qazanmaqda bizə nisbətən daha üstündürlər. Halbuki onlar cihada qalxdıqda mal və sərvətlərini biz qoruyuruq, onların övladlarını da biz böyüdürük”. Sonra Həzrət Peyğəmbərdən: “Ya Rəsuləllah, görəsən, onların savab və mükafatına biz də ortaq oluruqmu?” – deyə soruşdu. Allah Rəsulu (s) əshabəyə: “Siz bir qadının dinini öyrənmək məsələsində bundan daha gözəl bir sual soruşduğunu heç eşitdinizmi?” – deyə sual verdi. Onlar: “Xeyr, ey Allahın Elçisi!” – deyə cavab verdikdə Rəsulullah (s) qadına: “Ey Əsma, geri dön və arxanda cavab gözləyən qadınlara bunu bildir: Sizdən birinizin ərinə itaət edərək yaxşı davranması, onun istəklərini yerinə yetirməsi və tələbinə uyğun hərəkət etməsi, savab və mükafat baxımından bu saydıqlarının hamısına bərabərdir”[4], – buyurdu.
Bəli, bir qadın ərinə xidmət etməklə cihadda kişilərin qazandığı mükafatı və savabı qazanmış olur. Bu böyük və şərəfli bir məqama sahib olmaq təbiidir ki, nəfslə bir mübarizə, mücadilə tələb edir. Buna görə də Həzrət Əli qadının əri ilə gözəl rəftarını və ərinə xidmətini cihad adlandırmışdır.



[1] Təbərani “əl-Mucəmul-Kəbir” X, 293; Heysəmi, a. g. e., IV, 315

[2] “Vəsailuş-şiə”; 20/172

[3] “Nəhcülbəlağə”, kəlimati-qisar/494

[4] İbnül-Əsir “Üsdül-Ğabə” VII, 19; İbn Hacər “İsabə”
IV, 234

Geriyə qayıdın